A Filetta - U mare è u fiume

O chjucu ! Disse lu mare
Parlendu à un fiumicellu
Inde e mio acque chjare
Minutu è miserellu
Ti lampi, ghjochi, sparisci
Eppoi m'inturbidisci.

Guarda à mè, cume sò grande,
È po cume sò prufondu,
Aghju acqua ancu à rivende,
È copru u mezu mondu,
Quandu in un scornu hè notte,
In l'altru u sole sorte.

Ti portu disse lu fiume
U cantu di u russignolu,
Poi dinò u prufume,
Di u fiore campagnolu,
Lampu ind'a to sciuma bianca,
A dulcezza chì ti manca.

S'ellu si secca ogni fiume,
Puru di ssi pari mei,
Averìa menu fume,
In trè mesi, cinque o sei
A cosa hè più chè sicura,
Cambiarìa d'andatura !

Fiumi, paesi, pòpuli,
Ancu chjuchi è miserosi
In stu mondu sò ùtuli.
Perchè hanu certe cose
Ch'ellu ùn hà più putente,
Piglia a nota, è teni à mente !