A minestra di ceci - la soupe de pois chiches

Texte de Jean Costa - Testu di Ghjuvanni Costa

Carlu Ghjaseppu è Francesca Marìa éranu puvarelli cum'ellu ci n'era tanti prima per ssi paesi, è campàvanu un ghjornu piglia l'altru nant'à un urticellu è una pensiunella di guerra. È si pò dì chì pranzi 1 in casa soia si ne facìa pochi è micca, s'ellu ùn hè un pezzu di carne arrangiata 2 una dumènica si, una dumènica nò, è u ghjornu di a festa curpurale, un tianu 3 di caprettu.
Una sera d'invernu, c'èbbenu a visita d'un parintellu chì stava in cuntinente è chì dipoi parechji anni ùn avìanu più vistu. Era di sicuru ben piazzatu perchè bellu in lussu 4 scalete 5 in paese : ma mancu un suppu 6 fieru è cusì à a manu chì accittò senza fassi pricurà di stàssine à fà cena quandu Carlu Ghjaseppu, ùn pudendu fà di menu, a li pruponì 7.

È, in tantu, dopu avè accesu a làmpana à petrollu 1 azzingata à u sulaghju 2 è chì Francesca Marìa chjamava una "suspension", Carlu fece tastà à u cuginu un bichjeru di vinu di a so pèrgula 3 chì n'era assai fieru. Ma a moglia, da a porta di cucina, li facìa cennu dipoi un pezzettu è ellu ùn si avvidìa 4. Allora u chjamò à meza voce : "O Carlu Ghasè, veni un suppu quì chì t'aghju da vede."
È in cucina : "Dimmi un pocu, o caru di me, a sai chì e faci puricce 5 tù ? Cosa l'avemu da dà à manghjà à u to parentone ? Più d'una suppa di ceci un ci hè di prontu, è u casgiu vechju hè guasi compiu 6."
"Ùn ti fà gattivu 7 sangue o Ceccé chì ci aghju pensatu ancu eiu 8." rispose u maritu. "Diceraghju à u nostru cuginu chì ci hè una supparella di ceci per principià ma chì, per appressu, ci ai tombu un cunìgliulu casanu 9 è u ci acconci 10 prestu prestu à a stretta. 11"
"Un cunìgliulu ! " scappa guasi à alta voce à Francesca Marìa. "Ci sì o t'hè cullatu dighjà u vinu in capu ? Ùn sì mai statu capace di fammi un zitellu, ma sè tù riesci à fammi un cunìgliulu prontu è lestu 12 per stasera, allora un dicu più nulla !"

"Hai da stà cheta 1 prima di caccià scimùghjine 2 ?" li dice u maritu assicurèndusi per a porta scringnata 3 chì u cuginu un pudìa sente. "Èccuci ciò chè t'ai da fà : nu u mentre ch'eu pongu i piatti, tù, stàttine in cucina eppo', dopu una stonda, lascia cascà in pianu una purtata 4 - quella chì ti dete 5 màmmata è chì hè scannata 6 - è, sbiguttita 7, veni à annunziacci chì u tianu di cunìgliulu t'hè cascatu nu 8 u fucone. Cusì u nostru parente si cuntenterà cume noi di a suppa di ceci è d'un pezzu di casgiu, ma l'onore serà francu è salvu. 9"
È Carlu Ghjaseppu volta in salottu : "O Paré ! Chè no mèttimu ssa tàvula chì prestu hè ora di fà cena. Averai ancu l'appitittu !" In ssu mentre si sente dillandi 10, in cucina, un rimore di chjappulame 11 rottu. "Per Diu Santu ! Chì averà fattu ssa sguaiata 12 ?" dice Carlu Ghjaseppu spunendu 13 i piatti. "Scumettu 14 ch'ella hà fattu cascà u tianu." È s'affacca 15 in cucina duve a pòvera donna si ne stava insensulita 16, arritta e mani pendiconi 17. "Chì ci hè ?" mughja 18 Carlu per fassi sente da sala. "Ùn hè micca u cunìgliulu à u menu ?"
"Nò o cararellu" li risponde Ceccé sottu voce, "ùn hè micca u cunìgliulu ! Ùn a vedi chì hè a suppera di ceci chì m'hè sculisciata 19 di manu ?".